purani shaam na.e anganon ko roti hai
kahin charagh kahin rat-jagon ko roti hai
kahin ye haal ki hai fasla javaz-e-safar
kahin ye haal thakan faslon ko roti hai
ye shaḳh-e-dil thi hare mausamon ki dil-dada
so dasht-e-hijr men taaza ruton ko roti hai
vo aankh jis ne kabhi hairaten ata ki thiin
vo aankh aaj miri vahshaton ko roti hai
ye kaisa tark-e-sukunat ka e’tibar uTha
safar men ruh-e-safar hijraton ko roti hai
guzishta umr se mansub ik shanasa.i
pas-e-hajuz khaḌi fursaton ko roti hai
mira ḳhamir ye kis ḳhaal hai uTha hai ‘razi’
ki meri ḳhaak ajab maskanon ko roti hai
Leave a Reply