phir aaj chaar saal baad usi jagah khadi huun main
chabutre pe gard ki dabiz tah jami hui
guzarti saaton ke gham daron men chikhte hue
udaas khidkiyon ke rang dukh men bhigte hue
ye khvab bistaraon ki chadaron men sukhte hue
vo phuul ek baar jis tarah yahan sajae the
usi tarah se un ke zard naqsh kanpte hue
phir aaj chaar saal baad usi jagah khadi huun main
hava na-jane kitni baar dar pe aa ke ja chuki
na-jane kitni baar khidkiyon pe dastaken huiin
na-jane kitne qahqahon ko log bhuul bhi chuke
chabutre pe gard ki dabiz tah ne kah diya
ki muddaton se yaan kisi ne dastan nahin likhi
phir aaj chaar saal baad usi jagah khadi huun main
haveliyon ka tumtaraq tuut kar bikhar chuka
chaman se ab bahar ka har ik nasha utar chuka
ananiyat shikast-khurda khamushi men dhal chuki
aur aaj gumbadon men apni guunj sun rahi huun main
ki muddaton se ghar men muskurahaten na jal sakin
phir aaj chaar saal baad usi jagah khadi huun main
magar vo naam to kahin khude hue hain ped par
main roz-o-shab ki andhiyon ko apne ghar men hi rahun
main shaam ko udasiyon men ik darakht ke tale
purane naam chupke chupke yaad kar ke ro sakun
phir aaj chaar saal baad usi jagah khadi huun main
magar vo ped andhiyon men jaane kab ukhad gaya
na-jane kaun log is ko kaat kar chale gae
mujhe nahin khabar ki is ki patiyan kahan gaiin
tane ki lakdiyan bhi kis machine men badal gaiin
vo naam paniyon ke raste kahan chale gae
phir aaj chaar saal baad usi jagah khadi huun main
main laut jaungi chabutre ki gard punchh kar
guzarti saaton ke gham-daron men chikh jaenge
udaas khidkiyon ke rang dukh men bhiig jaenge
ye khvab bistaraon ki chadaron men suukh jaenge
main taaza phuul jis tarah se ab saja ke jaungi
vahi nuqush chaar saal baad kaanp jaenge
main ghurbaton ki qabr men khamosh laut jaungi
ye umr be-kanar raston men biit jaegi
main ab ujaad bastiyon men laut ke na aungi
Leave a Reply