nasib ab ke ḳhushi be-hisab le aaya
charagh lene gaya aftab le aaya
abhi jala ke uTha huun purane ḳhvabon ko
vo mere vaste phir taaza ḳhvab le aaya
phir aaj bhaav samundar ka asman pe tha
phir aaj apne liye main sarab le aaya
fasurda dekh ke us ko bahut pasheman huun
main regzar men kyon ik gulab le aaya
tujhe to haan ya nahin men javab dena tha
javab men tu mukammal kitab le aaya
abhi chala hi tha dil ik gunah karne ko
ki zehn ja ke ḳhayal-e-azab le aaya
Leave a Reply