Izhaar Aur Rasai

mu-qalam, saaz gul-e-taza thirakte paanv

baat kahne ke bahane hain bahut

aadmi kis se magar baat kare?

baat jab hila-e-taqrib-e-mulaqat na ho

aur rasai ki hamesha se hai kotah-kamand

baat ki ghayat-e-ghayat na ho!

ek zarra kaf-e-khakistar ka

sharar-e-jasta ke manind kabhi

kisi an-jani tamanna ki khalish se masrur

apne siine ke dahakte hue tannur ki lau se majbur

ek zarra ki hamesha se hai khud se mahjur

kabhi nairang-e-sada ban ke jhalak uthta hai

aab o rang o khat o mehrab ka paivand kabhi

aur banta hai maani ka khudavand kabhi

vo khudavand jo pa-basta-e-anat na ho!

isi ik zarre ki tabani se

kisi soe hue raqqas ke dast-o-pa men

kaanp uthte hain mah-o-sal ke niile girdab

isi ik zarre ki hairani se

sher ban jaate hain ik kuza-gar-e-pir ke khvab

isi ik zarra-e-la-fani se

khisht-e-be-maya ko milta hai davam

bam-o-dar ko vo sahar jis ki kabhi raat na ho!

aadmi kis se magar baat kare?

mu-qalam, saaz gul-e-taza thirakte paanv

aadmi sochta rah jaata hai,

is qadar baar kahan, kis ke liye, kaise utha.un

aur phir kis ke liye baat karun?

Leave a Comment