Sanjay Mishra Shauq
shabih-e-ruh kuchh aise nikhar di ga.i hai
ana faqiron ke kaase pe vaar di ga.i hai
tumhare dil pe bhi kuchh to asar hua hoga
gire-paḌe hue lafzon ko dhaar di ga.i hai
hamari aankh ke aansu subut hain is ka
hansi hamare labon ko udhar di ga.i hai
mire badan ke qafas asman se phir is baar
zaval-e-sub.h ki surḳhi guzar di ga.i hai
buland-qamati chubhne lagi thi duniya ko
so mere kandhon se gardan utaar di ga.i hai
numu ke aḳhiri imkan DhunDhne ke liye
mujhe zamin bhi ḳhalaon ke paar di ga.i hai
tavil hijr ki muddat bhi ham faqiron ko
ḳhulus-e-dil se ba-sad iḳhtisar di ga.i hai
hamari ruuh to kachche makan men ḳhush thi
to kyuun badan ko hayat-e-mazar di ga.i hai
Leave a Reply