Jigar Jalandhari
jab nigahen laḌin nigahon se
andhiyan uTThin dil ki rahon se
jurm sabit na ho to jurm nahin
qatl karte raho nigahon se
ham ne tufan paal rakkhe hain
apne ashkon se apni aahon se
apne jalvon ko dekhne ke liye
ḳhud ko dekho miri nigahon se
gard-e-rah ka bhi ehtiram karo
us ko nisbat hai badshahon se
is tarah samne vo aate hain
dekha jaata nahin nigahon se
teri rahmat ko rakh ke madd-e-nazar
dil ko bahla liya gunahon se
vahi dil ke qarib rahte hain
duur rahte hain jo nigahon se
jab se dhoke diye hain dil ne mujhe
bach ke rahta huun ḳhair-ḳhvahon se
zarra zarra mahak uTha hai jigar
kaun guzra hai dil ki rahon se
Leave a Reply