Jis Shakhs Ki Ho Zist Faqat Nam Se Tere

jis shaḳhs ki ho ziist faqat naam se tere

us shaḳhs ka kya haal ho paigham se tere

gaali hai ki hai sehr koi ya ki hai afsun

ji shaad hua jaata hai dushnam se tere

hai apni ḳhushi is men ki to jis men ḳhushi ho

aram hai apne taiin aram se tere

ahista qadam rakhiyo tu ai naqa-e-laila

majnun ka bandha aata hai dil gaam se tere

jab kuche men ja baithte hain tere to apni

ankhen lagi rahti hain dar-o-bam se tere

hai apne hamen kaam se kaam ai but-e-ḳhud-kam

ham kaam nahin rakhte hain kuchh kaam se tere

kya hijr ki raat aai ki manind-e-charaghan

phir jalne lage daagh ‘hasan’ shaam se tere

Leave a Comment