Shakeel Badayuni

Chandni Mein Rukh-E-Zeba Nahin Dekha Jata

chandni men rukh-e-zeba nahin dekha jaata

maah o khurshid ko yakja nahin dekha jaata

yuun to un ankhon se kya kya nahin dekha jaata

haan magar apna hi jalva nahin dekha jaata

dida-o-dil ki tabahi mujhe manzur magar

un ka utra hua chehra nahin dekha jaata

zabt-e-gham haan vahi ashkon ka talatum ik baar

ab to sukha hua dariya nahin dekha jaata

zindagi aa tujhe qatil ke havale kar duun

mujh se ab khun-e-tamanna nahin dekha jaata

ab to jhuti bhi tasalli ba-sar-o-chashm qubul

dil ka rah rah ke tadapna nahin dekha jaata

Leave a Comment