itni mushkil men bhi ahbab na Dalen mujh ko
ki sambhalna bhi na chahun to sambhalen mujh ko
gham-e-dauran gham-e-janan gham-e-jan ek hue
Dar raha huun ye kahin maar na Dalen mujh ko
munfarid meri tabi.at hai ye halat kahin
ravish-e-am ke sanche men na Dhalen mujh ko
main to is par bhi huun raazi ki tire shahr ke log
mere bante nahin apna hi bana len mujh ko
aap mujh se kisi ta.abir ki phir baat karen
pahle is ḳhvab-e-tamanna se jaga len mujh ko
nahin ma.alum ki kal tak main rahun ya na rahun
mehrban aaj hi ji-bhar ke sata len mujh ko
gardishon ke liye ab tak na ye mumkin na hua
kisi surat mire mehvar se haTa len mujh ko
in bulandi ke makinon ko mayassar hi nahin
‘lais’ vo haath jo pasti se uTha len mujh ko
Leave a Reply