Jo Ashk Barsa Rahe Hain Sahib

Ajmal Siraj

jo ashk barsa rahe hain sahib

ye raegan ja rahe hain sahib

yahi taghayyur to zindagi hai

abas ghule ja rahe hain sahib

jo ho gaya hai so ho gaya hai

fuzul pachhta rahe hain sahib

ye sirf ginti ke chaar din hain

baḌe maze aa rahe hain sahib

abhi to ye ḳhaak ho rahega

jo jism chamka rahe hain sahib

koi irada na koi jaada

kahan kidhar ja rahe hain sahib

idhar zara ghaur se to dekhen

ye phuul murjha rahe hain sahib

jahan ki nayaft ke sabab men

jahan ka gham kha rahe hain sahib

ye main nahin huun ye mera dil hai

ye kis ko samjha rahe hain sahib

sukun ki niind soiyega

vo din bhi bas aa rahe hain sahib

jo aap ke hijr men mile hain

ye din gine ja rahe hain sahib

bas ab nahin kuchh bhi yaad mujh ko

bas aap yaad aa rahe hain sahib