Shakeel Gwaliari
aaj us bazm men yuun dad-e-vafa di jaa.e
ai gham-e-ishq tiri umr baḌha di jaa.e
mausam-e-ḳhanda-e-gul hai to zaban band rakkhen
baat apni bhi hansi men na uḌa di jaa.e
ishva-e-naz-o-ada jaur o jafa makr o dagha
kaise ji len jo har ik baat bhula di jaa.e
us ke gham hi se hai har dard ka rishta ab tak
dil pe jab choT lage us ko dua di jaa.e
jurm-e-ahbab ki pursish bhi mujhi se hai ‘shakil’
mujh ko mere hi qusuron ki saza di jaa.e
Leave a Reply