Hameed Almas
ghar hai to dar bhi hoga divar bhi rahegi
zanjir bhi hilegi jhankar bhi rahegi
tarikiyon ke qalb-e-tarik-tar men DhunDo
ik sham.a mavara-e-anvar bhi rahegi
behtar tha be-ruḳhi ka iz.har yuun na hota
maana ki kuchh to vaj.h-e-inkar bhi rahegi
jis aankh ko chhupa kar rakkha hai har nazar se
vo nim-va bhi hogi bedar bhi rahegi
sahra talab ka goya maidan-e-karbala hai
paanv men ret sar par talvar bhi rahegi
qurbat ki sa.aton men duuri ka ḳhauf hoga
saa.e se raushni ki paikar bhi rahegi
zahir hai sadgi bhi ‘almas’ ke suḳhan se
lekin ghazal ki fitrat pur-kar bhi rahegi
Leave a Reply