Ataul Hasan
dilon ko rahta hai kuchh din bharam mohabbat ka
bigaḌ dete hain phir huliya ham mohabbat ka
ye vo hua hai jo barson ghubar uḌati hai
dinon men jaata nahin dost gham mohabbat ka
havas dilati hai mujh ko bhi ishtiha lekin
lihaz karta huun teri qasam mohabbat ka
hamare paas nahin gham ka aur koi tiryaq
namida ankhon pe karte hain dam mohabbat ka
haqiqatan the kabhi ham nihal jazbon men
aur ab to ḳhvab bhi aata hai kam mohabbat ka
tumhare saath bhala kis tarah nibhegi ‘hasan’
tumhara bughz hai mera dharam mohabbat ka
Leave a Reply