Muntazir Firozabadi
ham na vahshat ke maare marte hain
teri dahshat ke maare marte hain
maar mat be-muravvati se unhen
jo muravvat ke maare marte hain
shikva kya kiije sham-e-ghurbat ka
apni shamat ke maare marte hain
kya raqibon ko mariye vo aap
sab raqabat ke maare marte hain
yaar se duur hain vatan se juda
is musibat ke maare marte hain
saikḌon us se hainge ham-aghosh
lakhon hasrat ke maare marte hain
kuchh hamari na puchhiye sahab
ham to ghairat ke maare marte hain
hai ajab ziist ‘muntazir’ un ki
jo ki ulfat ke maare marte hain
Leave a Reply