Koi Silsila Nahin Jawedan Tere Sath Bhi Tere Baad Bhi

Azhar Faragh

koi silsila nahin javedan tire saath bhi tire ba.ad bhi

main to har tarah se huun ra.egan tire saath bhi tire ba.ad bhi

mire ham-nafas tu charagh tha tujhe kya ḳhabar mire haal ki

ki jiya main kaise dhuan dhuan tire saath bhi tire ba.ad bhi

na tira visal visal tha na tiri juda.i juda.i hai

vahi halat-e-dil-e-bad-guman tire saath bhi tire ba.ad bhi

main ye chahta huun ki umr-bhar rahe tishnagi mire ishq men

koi justuju rahe darmiyan tire saath bhi tire ba.ad bhi

mire naqsh-e-pa tujhe dekh kar ye jo chal rahe hain unhen bata

hai mira suragh mira nishan tire saath bhi tire ba.ad bhi