Poet
chalte chalte rahon se kaT jaana paḌta hai
hote hote manzar se haT jaana paḌta hai
dekhna paḌ jaata hai ḳhud ko kar ke ek tamasha.i
apni dhuul uḌa kar ḳhud aT jaana paḌta hai
ḳhattati se duur bhaTakne vaale soch ke daman ko
kore kaghaz ke hathon phaT jaana paḌta hai
sazina jab qadam baḌhata hai us ki pazebon ka
kanon ko jhankar ki aahaT jaana paḌta hai
ḳhvahish mar jaa.e to us ki chita ko aag dikhane men
dhaḌkan dhaḌkan dil ke marghaT jaana paḌta hai
taab nahin ho jis men kanch ko reza reza karne ki
us patthar ko TukḌon men baT jaana paḌta hai
ḳhud ke mutlashi ko ek na ik din aḳhir-kar apne
bhule-bisre hue ki chaukhaT jaana paḌta hai
sachcha.i vo jang hai jis men ba.az auqat sipahi ko
aap muqabil apne hi DaT jaana paḌta hai
ik chingari aag laga jaati hai ban men aur kabhi
ek kiran se zulmat ko chhaT jaana paḌta hai
baat riya-kari ke bin ban paati nahin hai ‘ḳhavar’
is dozaḳh men karvaT karvaT jaana paḌta hai
Leave a Reply