dil ko har gaam pe dhaḌke se lage rahte hain
tujh ko kho dene ke ḳhadshe se lage rahte hain
sar to kaT jaate hain jismon se magar sadiyon tak
ḳhaak par ḳhuun ke dhabbe se lage rahte hain
jhaaḌ ponchh ek mire kaam nahin aa paa.i
dar-o-divar pe jaale se lage rahte hain
pyaas uḌti hai lab-e-hijr pe manind-e-ghubar
vasl ki jhiil pe pahre se lage rahte hain
dasht se shahr men tanha.i ke Dar le aa.e
shahr men bhi yahi khaTke se lage rahte hain
ḳhvab jo dekha nahin ham ne sar-e-ḳhvab ‘najib’
is ki ta.abir ke dhaḌke se lage rahte hain
Leave a Reply