Ye Wo Aazmaish-E-saKHt Hai Ki baDe baDe Bhi Nikal Gae

Siraj Lakhnavi

ye vo azma.ish-e-saḳht hai ki baḌe baḌe bhi nikal ga.e

ye unhin patangon ka zarf hai ki para.i aag men jal ga.e

tiri astin ki kahkashan jo nazar paḌi to machal ga.e

jo tiri ḳhushi ka nichoḌ the vahi ashk taron men Dhal ga.e

mile sard-ahon men ashk-e-gham to sharar-o-barq men Dhal ga.e

ye na jaane kaise charagh the ki hava ke ruḳh pe bhi jal ga.e

kisi kisi phuul par kisi shaḳh par kahin ab Thaharti nahin nazar

mire ashiyane ke saath men mire hausle bhi to jal ga.e

mire valvalon ke mizaj bhi ba-lihaz-e-mausam-e-vaqt hain

kabhi sard aah men jal ga.e kabhi ashk ban ke pighal ga.e

ye to kaam himmat-e-dil ka hai tiri raah men pas-o-pesh kya

jo Thahar ga.e vo Thahar ga.e jo nikal ga.e vo nikal ga.e

bas ik aanch si nazar aa.i thi hai ye raaz ab bhi Dhaka Dhaka

vo tera hasin itaab tha ki ham apne taav men jal ga.e

jo tarashe fikr ne aa.ine tira aks husn-e-nazar bana

jinhen tujh se kuchh bhi lagao tha vo ḳhayal sher men Dhal ga.e

uTha shor mahfil-e-naz se huiin abdida masarraten

liya kis ne naam ‘siraj’ ka ki charagh ashk ke jal ga.e