Urus-Ul-Bilad

vasia shahr men ik chikh kya sunai de

bason ke shor men railon ki gadgadahat men

chahal-pahal men bhidon jaisi bhanbhanahat men

kisi ko pakdo sar-e-rah maar do chahe

kisi afifa ki ismat utaar do chahe!

vasia shahr men ik chikh kya sunai de!

aziim shahr bade kamon ke liye hain miyan

vazir-e-ala ki taqrir, leaderon ke julus

siyasaton ke mazahir, khulus bahr-e-khulus

ye rat-jagon ki jagah, nav-nosh ka gadh hai

ye tum se kis ne kaha ilm o hosh ka gadh hai

abhi abhi shah-e-qufqaz aae hain dekho

muazzizin-e-urus-ul-bilad sab mil kar

sipas-nama unhen is tarah karenge pesh

ki jaise dil ki kali phuul ho gai khil kar

phir is ke baad kisi bank ke bade karta

koi safir kisi desh ke nae mukhiya

mushir-e-sanati mansuba-bandiyon ke liye

jatan saqafati aina-saziyon ke liye

bade plan, badi yojna, badi baten

ziyafaten bade hotel, badi badi ghaten!

aziim shahr bade kamon ke liye hai miyan!

yahan mazar hain un ke bhi jin ke naam nahin

sunahri shahr ki taskhir karne aae the

unhen shikam se bahut duur aage jaana tha

vo is jahan ki taamir karne aae the!

bade dimagh the tabbaa the zahin the sab

magar siyasat-e-duniya men kam-tarin the sab

aziim shahr bade kamon ke liye hain miyan

shikast-e-dil koi roket hai jo dikhai de

aziim shahr men ik chikh kya sunai de!

Leave a Comment