Umair Najmi
har ik hazar men bas panch saat hain ham log
nisab-e-ishq pe vajib zakat hain ham log
dabao men bhi jama.at kabhi nahin badli
shurua din se mohabbat ke saath hain ham log
jo sikhni ho zaban-e-sukut bismillah
ḳhamoshiyon ki mukammal lughat hain ham log
kahaniyon ke vo kirdar jo likhe na ga.e
ḳhabar se hazf-shuda vaqi.at hain ham log
ye intizar hamen dekh kar banaya gaya
zuhur-e-hijr se pahle ki baat hain ham log
kisi ko rasta de den kisi ko paani na den
kahin pe niil kahin par furat hain ham log
hamen jala ke koi shab guzar sakta hai
saḌak pe bikhre hue kaghzat hain ham log
Leave a Reply