Misal-E-Tar-E-Nazar Kya Nazar Nahin Aata

misal-e-tar-e-nazar kya nazar nahin aata

kabhi khayal men mu-e-kamar nahin aata

hamare aib ne be-aib kar diya ham ko

yahi hunar hai ki koi hunar nahin aata

muhal hai ki mire ghar vo raat ko aae

ki shab ko mehr-e-darakhshan nazar nahin aata

tamam khalq men rahti hai dhuup raton ko

vo mehr baam se jab tak utar nahin aata

muhal hai ki jahannam men khuld se jaaen

jo dar par aap ke jaata hai ghar nahin aata

hamari ziist men the saath kaun kaun ai ‘barq’

ab ek fatiha ko qabr par nahin aata

Leave a Comment