Farhat Ehsas
jis ko jaisa bhi hai darkar use vaisa mil jaa.e
tu mayassar ho mujhe aur tujhe duniya mil jaa.e
sang se sang ke Takrane ka manzar dekhun
kabhi aisa ho ki tujh ko koi tujh sa mil jaa.e
ye dhaḌakta hua dil us ke havale kar duun
ek bhi shaḳhs agar shahr men zinda mil jaa.e
saḳht sardi men ThiThurti hai bahut ruuh miri
jism-e-yar aa ki bechari ko sahara mil jaa.e
shahr ki bhiiḌ mujhe tera bulava manzur
shart ye hai mira khoya hua sahra mil jaa.e
tu ḳhuda hai to mujhe kufr men mustahkam kar
ki mujhe raz-e-sanam-ḳhana-e-duniya mil jaa.e
ham to bas dhuup ki shiddat men kami chahte hain
kab kaha hai ki kahin raah men saaya mil jaa.e
apne a.ina-e-tauhid men allah-miyan
dekhte rahiye koi aap hi jaisa mil jaa.e
fasl-e-sher aa.i hai bazar-e-suḳhan men dekh aao
farhat-ehsas bhi shayad koi taaza mil jaa.e
Leave a Reply