Anwar Minai
har dam dua-e-ab-o-hava mangte rahe
nange daraḳht sabz qaba mangte rahe
yaron ka e’tiqad bhi andha tha is qadar
gungi rivayaton se sada mangte rahe
kitni ajiib baat thi jab sard raat se
ham dopahar ki garm hava mangte rahe
karte rahe jo din ke ujalon se ehtiraz
vo bhi andheri shab men ziya mangte rahe
kuchh log aise bhi the jo lamhat-e-karb se
asuda sa.aton ka pata mangte rahe
Leave a Reply