kya hota hai ḳhizan bahar ke aane jaane se
sab mausam hain dil khilne aur dil murjhane se
ek diya kab rok saka hai raat ko aane se
lekin dil kuchh sambhla to ik diya jalane se
jo phulon aur kanTon ki pahchan nahin rakhta
phuul nahin rukte ghar us ka bhi mahkane se
jalte nazar nahin aa.e aur jal kar ḳhaak hue
duur ka rishta apna bhi nikla parvane se
kachchi umr men aur savan men kaise baaz aa.en
ankhen jagmag karne se anchal lahrane se
kitna achchha lagta hai ik aam sa chehra bhi
sirf mohabbat-bhara tabassum lab par laane se
ga.e dinon men rona bhi to kitna sachcha tha
dil halka ho jaata tha jab ashk bahane se
bhigi raat ka sannaTa karta hai vahi baten
zaḳhm hare hote hain jo baten yaad aane se
Leave a Reply