Obaidullah Aleem
sukhan men sahl nahin jaan nikal kar rakhna
ye zindagi hai hamari sambhal kar rakhna
khula ki ishq nahin hai kuchh aur is ke siva
raza-e-yar jo ho apna haal kar rakhna
usi ka kaam hai farsh-e-zamin bichha dena
usi ka kaam sitare uchhal kar rakhna
usi ka kaam hai is dukh-bhare zamane men
mohabbaton se mujhe mala-mal kar rakhna
bas ek kaifiyat-e-dil men bolte rahna
bas ek nashshe men khud ko nihal kar rakhna
bas ek qamat-e-zeba ke khvab men rahna
basa ek shakhs ko hadd-e-misal kar rakhna
guzarna husn ki nazzargi se pal-bhar ko
phir us ko zaiqa-e-la-zaval kar rakhna
kisi ke bas men nahin tha kisi ke bas men nahin
bulandiyon ko sada paemal kar rakhna
Leave a Reply