adeem-hashmi

Aankhon Mein Aansuon Ko Ubharne Nahin Diya

ankhon men ansuon ko ubharne nahin diya

mitti men motiyon ko bikharne nahin diya

jis raah par pade the tire paanv ke nishan

is raah se kisi ko guzarne nahin diya

chaha to chahaton ki hadon se guzar gae

nashsha mohabbaton ka utarne nahin diya

har baar hai naya tire milne ka zaiqa

aisa samar kisi bhi shajar ne nahin diya

ye hijr hai to is ka faqat vasl hai ilaaj

ham ne ye zakhm-e-vaqt ko bharne nahin diya

itne bade jahan men jaega tu kahan

is ik khayal ne mujhe marne nahin diya

sahil dikhai de to raha tha bahut qarib

kashti ko rasta hi bhanvar ne nahin diya

jitna sakun mila hai tire saath raah men

itna sukun to mujhe ghar ne nahin diya

is ne hansi hansi men mohabbat ki baat ki

main ne ‘adim’ us ko mukarne nahin diya

More Poems

Leave a Comment