lazzat-e-sang na puchho logo umr agar haath aa.e phir
majnun ban kar sahra sahra koi use ganva.e phir
ham ne to is ek aas par saare diip jala.e phir
raat kabhi saath aa.e kisi ke shayad aur na jaa.e phir
yuun bhi apna ahd-e-javani ḳhvab tha dilkash chehron ka
aur ghubar-e-vaqt ne to vo chehre bhi dhundla.e phir
sab ke apne apne dukh hain sunne vaala koi nahin
sunne vaala koi na ho to kis ko koi suna.e phir
‘ishqi’ tum ne umr guzari hai ummid-e-baharan men
aur ayyam-e-baharan bhi gar tum ko raas na aa.e phir
Leave a Reply