kya kahen kaise basar hijr ki raten ki hain
umr bhar chand se ik shaḳhs ki baten ki hain
kab azanon se na mamur tha ka.aba dil ka
kab faqiron ne qaza ishq-salaten ki hain
teri ḳhushbu se koi ḳhat na hava par likha
ḳhushk kis dhuup ne phulon ki davaten ki hain
haar to khel ka hissa thi magar farq ye hai
maat se pahle hi tah ham ne bisaten ki hain
lauT jaate hain ye Takra ke sar-e-sahil se
muztarib zehnon ne kab paar furaten ki hain
Doli uTThi na tahi-chashm sitaron ki ‘najib’
sub.h-e-namnak ne ruḳhsat ye baraten ki hain
Leave a Reply