pēr-e-vamanda koi
coat pe mehnat ki siyahi ke nishan
naujavan bete ki gardan ki chamak dekhta huun
ik raqabat ki siyah lahr bahut tez
mire sina-e-sozan se guzar jaati hai
jis tarah taaq pe rakkhe hue gul-dan ki
mas-o-sim ke kason ki chamak
aur gulu uljhe hue taron se bhar jaata hai
koele aag men jalte hue
kin yadon ki kis raat men
jal jaate hain
kya inhi kanon ki yadon men jahan
salha-sal ye asuda rahe
unhi be-ab darakhton ke vo jangal
jinhen pirana-sari baar hui jaati thi
koele lakhon baras daur ke khvabon men ulajh jaate hain
aaj shab bhi vo badi der se
ghar lauta hai
us ke alfaz ko
in rangon se avazon se kya rabt
jo is gham-zada ghar ke khas-o-khashak men hain
us ko is mez par bikhri hui
khushbuon ke jangal se gharaz
aaj bhi apne aqide pe ba-dastur
ba-zid qaaem hai
vo darakhton ke tanomand tane
apne ainda ke khvabon men asiir
gard-bad aa hi gae
un ki rihai ka vasila ban kar
khud se mahjuri-e-nagah ka hiila ban kar
aae aur chal bhi diye
tul-e-alamnak ki dahliz pe
rukhsat kah kar
aur vo lakhon baras soch men
ainda ke mauhum men khvabida rahe
mere bete tujhe kuchh yaad bhi hai
main ne bhi shor machaya tha kabhi
khaak ke bigde hue chehre ke khilaf
lahn be-rang hua sun ke
miri jaan bhi pukar uthi thi
main kabhi ek ana aur kabhi do ka sahara leta
apni sathi se main kah uthta ki jaago ai jaan
harana tira-bayaban men
bhatakte hue patton ka hujum
mera dar mujh ko nigal jaega
mere kanon men mire karb ki avaz
palat aati thi
tujhe be-kar khudaon pe yaqin
ab bhi nahin
ab bhi nahin
aaj bhi apne hi ilhad ki kursi men
pada unghta huun
naujavan bete ke alfaz pe chaunk uthta huun
tu ne bete
ye ajab khvab sunaya hai mujhe
apna ye khvab kisi aur se hargiz na kaho
kabhi ahista se darvaza jo khulta hai to hans deta huun
ye bhi is baat ki sarsar ki
nai chaal naya dhoka hai
phuul ya pariyan banane ka koi nuskha
mire paas nahin hai bete
mujhe fardaon ke sahra se bhi
afsun-e-rivayat ki lahak aati hai
aag men koele bujhne ki tamanna na karo
in se ainda ke mitte hue asar
ubhar aenge
in guzarte hue lamhat ki tanhai men
kaisa ye khvab sunaya hai mujhe tu ne abhi
nahin har ek se
har ek se ye khvab kaho
is se jaag uthta hai
soya hua majzub
miri aag ke paas
aise majzub ko ik khvab bahut
khvab bahut khvab bahut
aise har mast ko
ik khvab bahut
Leave a Reply