Saqib Lakhnavi
asir-e-ishq-e-maraz hain to kya dava karte
jo intiha ko pahunchte to ibtida karte
agar zamane men apne kabhi vafa karte
dahan-e-zaḳhm taḌapne pe kyuun hansa karte
mariz lazzat-e-fariyad kah nahin sakte
jo naale kaam na aate to chup raha karte
ham un se mil ke bhi furqat ka haal kah na sake
maza visal ka khote agar gila karte
mazaq-e-dard se na-vaqifi nahin achchhi
kabhi kabhi to miri dastan suna karte
shab-e-firaq gavara na thi magar dekhi
ab aur ḳhatir-e-mehman ziyada kya karte
dar-e-qafas na khula qadr-e-sabr kar sayyad
taḌapte ham to pahaḌon men rasta karte
ise jala ke use aag di bura na kiya
jigar jo rakhte the aḳhir vo dil ko kya karte
zaban valon se sun sun ke hai yaqin ‘saqib’
ki bolte to sanam bhi ḳhuda ḳhuda karte
Leave a Reply