qarar-e-jan bhi tumhi iztirab-e-jan bhi tumhi
mira yaqin bhi tumhi ho mira guman bhi tumhi
tumhari jaan hai nikhat tumhara jism bahar
miri ghazal bhi tumhi meri dastan bhi tumhi
ye kya tilism hai dariya men ban ke aks-e-qamar
ruke hue bhi tumhi ho ravan-davan bhi tumhi
khuda ka shukr mira rasta muayyan hai
ki karvan bhi tumhi mir-e-karvan bhi tumhi
tumhi ho jis se mili mujh ko shan-e-istighna
ki mera gham bhi tumhi gham ke raz-dan bhi tumhi
nihan ho zehn men vijdan ka dhuan ban kar
ufuq pe manzil-e-idrak ka nishan bhi tumhi
tamam husn-e-amal hon tamam husn-e-bayan
ki mera dil bhi tumhi ho miri zaban bhi tumhi
Leave a Reply