zinda hain ham to aaj bhi vahm-o-guman ke biich
umr-e-ravan kaTi miri sud-o-ziyan ke biich
un ke to qaul-o-fe.al men behad tazad hai
vo jhuuT kahte phirte hain saare jahan ke biich
dil ko yaqin hai bhuul na pa.enge ham ko vo
DhunDa karenge ham ko bhi vo raftagan ke biich
ham ne to saath dene ka va.ada nahin kiya
mahv-e-safar rahe the faqat karvan ke biich
chain-o-sukun luuT ke aram le gaya
aa.ega us ka zikr miri dastan ke biich
ham ne ‘shagufta’ duur Thikana bana liya
vo ham ko DhunDta hi raha gulsitan ke biich
Leave a Reply