us ne puchha bhi magar haal chhupa.e ga.e ham
apne hi aap men ik hashr uTha.e ga.e ham
zindagi dekh ki ehsan tire kitne hain
dil ke har daagh ko a.ina bana.e ga.e ham
phir vahi shaam vahi dard vahi apna junun
jaane kya yaad thi vo jis ko bhula.e ga.e ham
kin darichon ke charaghon se hamen nisbat thi
ki abhi jal nahin paa.e ki bujha.e ga.e ham
umr bhar hadse hi karte rahe istiqbal
vaqt aisa tha ki siine se laga.e ga.e ham
raste dauḌe chale jaate hain kin samton ko
dhuup men jalte rahe saa.e bichha.e ga.e ham
dasht-dar-dasht bikharte chale jaate hain ‘shanas’
jaane kis alam-e-vahshat men uTha.e ga.e ham
Leave a Reply