kitni mahfuz zindagi thi kabhi
dushmani thi na dosti thi kabhi
ab faqat qahqahe lagata huun
meri ankhon men bhi nami thi kabhi
soch kar ab qadam uThata huun
meri rahon men gum rahi thi kabhi
ab dhuan hai jo pi rahe hain nam
aag har moḌ par lagi thi kabhi
ab to badla hai apna paimana
jo buri hai vahi bhali thi kabhi
tha safed-o-siyah se vaqif
meri ankhon men raushni thi kabhi
ab to tasbih le ke baiThe hain
haath men jin ke lablabi thi kabhi
sab ka mahbub ek tha ‘hamdam’
shahr men ek hi gali thi kabhi
Leave a Reply