Shabab-E-Gurezan

Noon Meem Rashid

mai-e-taza-o-nab hasil nahin hai

to kar lunga durd-e-tah-e-jam pi kar guzara!

mujhe ek nau-ras kali ne

ye taana diya thaa:

tiri umr ka ye taqaza hai

tu aise phulon ka bhonra bane

jin men do chaar din ki mahak rah gai ho

ye sach hai vo tasvir

jis ke sabhi rang dhundla gae hon

nae rang us men bhare kaun la kar

nae rang laae kahan se?

tire asman kaa,

main ik taaza varid sitara sahi

janta huun ki, is asman par

bahut chand, suraj, sitare ubhar kar

jo ik baar duube to ubhre nahin hain

faramosh-gari ke niile ufuq se,

unhi ki tarah main bhi

na-tajarba-kar insan ki himmat se aage badha huun,

jo aage badha huun,

to dil men havas ye nahin hai

ki ab se hazaron baras baad ki dastanon men

zinda ho ik baar phir naam mera!

ye sham-e-dil-avez to ik bahana hai,

ik koshish-e-na-tavan hai

shabab-e-gurezan ko jaate hue rokne ki

vagarna hai kaafi mujhe ek pal ka sahara,

huun ik taaza varid, musibat ka maara

main kar lunga durd-e-tah-e-jam pi kar guzara!