Shamsa Najm
sab ashna bhi ho ke rahe ashna nahin
is shahr-e-be-vafa men koi aasra nahin
muddat hui hai us se koi rabta hue
jo shaḳhs ek pal ke liye bhulta nahin
rahne bhi de tu ab ye mohabbat ke chonchle
mujh ko yaqin nahin hai ki tu bevafa nahin
ai hukmran dekh ki sahme hue hain tifl
ye dekh kar zamir tira jagta nahin
mere vatan ke log to tarsen sukun ko
hai zulm is qadar ki koi intiha nahin
Leave a Reply