ḳhvabon ki rahguzar se ḳhayalon ki raah se
tujh tak pahunch raha huun ujalon ki raah se
main janta huun rasta ghazlon ke shahr ka
aaya huun chal ke zohra-jamalon ki raah se
main rafta rafta karb ki manzil tak aa gaya
dil ka qarar DhunDne valon ki raah se
be-shakl kaifiyat ke hain chehre juda juda
kuchh baat ban rahi hai misalon ki raah se
afsanon ki bayaz men afsana hi to hai
kuchh mera tazkira bhi havalon ki raah se
pahuncha huun us ke dard ki gahra.i tak ‘shakil’
uljhe hue se chand savalon ki raah se
Leave a Reply