har ik lamha hamen ham se juda karti hui si
hamare biich divar-e-ana banti hui si
larazti kanpti misl-e-haya simTi hui si
miri janib baḌhi us ki sada sahmi hui si
vahi manzar larazta hai nigahon men abhi tak
dariche haath phaila.e hava ruThi hui si
tire qadmon ki aahaT rahguzar-dar-rahguzar raushan
tiri aamad ki ḳhushbu ja-ba-ja bikhri hui si
sabhi manus chehre ajnabi se lag rahe hain
hamen jiine nahin degi faza badli hui si
nigahon ke ufuq hairaniyon ke abr men gum
koi shai a.ine men runuma hoti hui si
na jaane kis tabahi ki taraf le ja.egi ab
hamari zindagi be-saḳhta baḌhti hui si
mujhe mujh se alag karne pe amada hai ‘aḳhtar’
miri pahchan mujh se ashna hoti hui si
Leave a Reply