Qamar Siddiqi
ḳhvab nahin hai sannaTa hai lekin hai ta.abir bahut
sachchi baten kam kam hain aur jhuuT ki hai tash.hir bahut
kya kya chehre hain ankhon men shaklen kya kya zehn men hain
yaden goya album hain aur album men tasvir bahut
qissa hai bas do-pal ka ye milne aur bichhaḌne ka
karne vaale ishq ki yuun to karte hain tafsir bahut
ham to sahab-e-ahl-e-junun hain duniya khel-tamasha hai
ahl-e-ḳhirad ki ḳhatir hogi duniya ki zanjir bahut
saari shaklen dhundli dhundli mub.ham sa hai manzar bhi
ḳhvab ki kachchi buniyadon par karni hai ta.amir bahut
qissa ye mahdud na tha kuchh honTon ki ḳhamoshi tak
kahne ko to kahti thi un ankhon ki tahrir bahut
Leave a Reply