Bal paDne Laga Abru-E-KHamdar Ke Upar

bal paḌne lagā abrū-e-ḳhamdār ke uupar

aa jaa.e na aafat kahīñ do-chār ke uupar

qatrāt-e-araq haiñ nahīñ ye silk-e-guhar haiñ

kyā aks-fagan us ruḳh-e-gulnār ke uupar

ḳhūñ-rezī pe bāñdhegā kamar jab ki vo saffāk

gulzār banā degā tan-e-zār ke uupar

bosa jo talab maiñ ne kiyā bole ye aġhyār

talvār chalegī isī takrār ke uupar

va.ada kiyā aane kā par aa.e nahīñ hargiz

kyā ho.e yaqīn aap ke iqrār ke uupar

ḳhūboñ ko mohabbat hai buroñ se bhī ki juuñ gul

rahtā hai sadā sāya-fagan ḳhaar ke uupar

tāsīr hai taqrīr meñ us shoḳh kī itnī

ḳhāmosh huiiñ bulbuleñ guftār ke uupar

Leave a Comment