Masarrat Ka Hamesha Ek Hi Aalam Nahin Hota

masarrat ka hamesha ek hi aalam nahin hota

karam hota to hai un ka magar paiham nahin hota

ḳhushi ka gham jinhen hota hai samjho gham-nasib un ko

jinhen gham ki ḳhushi hoti hai un ko gham nahin hota

na le jaata jo majnun alam-e-divangi ham se

to us ka zikr-e-ḳhair afsana-e-alam nahin hota

kahan hai tu bura.i se bura.i miT nahin sakti

are ghafil andhere se andhera kam nahin hota

yahi vo vaqt hai jab aadmi ko hosh aata hai

ḳhuda ki yaad se ghafil Dil-e-pur-gham nahin hota

bura jab vaqt aata hai to is duniya-e-ulfat men

koi monis nahin hota koi hamdam nahin hota

tasalli se kabhi taskin-e-ḳhatir ho nahin sakti

junun-e-shauq baḌh jaata hai is se kam nahin hota

faza-e-bagh-e-hasti men ḳhizan bhi hai baharen bhi

kahan ḳhushiyan nahin hotin kahan matam nahin hota

nibah asan nahin duniya ki rasm-e-dost-dari ka

koi dam-saz hota hai to ham men dam nahin hota

fana ke ba.ad milta hai sukun-e-rahat-e-manzil

jahan shiraza-e-hasti kabhi barham nahin hota

koi milta hai jab rah-e-talab men rahbar-e-kamil

to ham ko duri-e-manzil ka bhi kuchh gham nahin hota

hamare ek dam par ek dam jo kuchh guzarti hai

mohabbat men kabhi aisa to ai hamdam nahin hota

tumhin imdad ko ‘ḳhushtar’ ki aa jaate ho mushkil men

sahara jab koi ai sarvar-e-alam nahin hota