ham uTh ja.enge mahfil se to un ko justuju hogi
hamara zikr aa.ega hamari guftugu hogi
ye maana dekhne ko vo zamana ham nahin honge
hamen DhunDegi duniya jab tumhari justuju hogi
kisi ka ḳhun-e-nahaq ra.egan to ja nahin sakta
vafa ka ruup nikhrega mohabbat surḳh-ru hogi
tumhare naam se pahle hamara naam aa.ega
jahan ishq-o-vafa ke silsile men guftugu hogi
baḌa pur-lutf hoga vo niyaz-o-naz ka aalam
nazara tu karega dil nazar se guftugu hogi
farogh-e-jalva-gah-e-naz apni hi nazar tak hai
vahan tak jalve bhi honge jahan tak justuju hogi
tajalli ḳhud bhi parda hai magar jab dil se dekhenge
ba-har-surat nigahon men vo surat hu-ba-hu hogi
nazar ka mudda.a dil ki tamanna kaun dekhega
vo jan-e-arzu hoga to kis ko aarzu hogi
bikhar ja.ega sab husn-e-chaman-bandi ka shiraza
hava-e-sar-kashi men jab faza-e-rang-o-bu hogi
ham is munh bolti bechargi par dam-ba-ḳhud honge
vo honge samne be-ḳhud nigah-e-jalva-ju hogi
saliqa aate aate aaya hai nazron se piine ka
‘rishi’ ab mai-kashi be-gana-e-jam-o-subu hogi
Leave a Reply