Poet
tum ne bhule se kabhi ye nahin socha hoga
ham jo bichhḌenge to kya haal hamara hoga
aa ga.e ho to ujala hai miri duniya men
jaoge tum to andhera hi andhera hoga
ye na kahiye ki miri aankh se Tapka aansu
chhoḌiye bhi koi TuuTa hua taara hoga
kya ḳhabar thi ki tire shahr se pahle ai dost
raat aa ja.egi aur raah men dariya hoga
ḳhvab lab ḳhvab jabin ḳhvab ada ḳhvab haya
itne ḳhvabon men koi ḳhvab to sachcha hoga
dil ke a.ine men kar aks-e-tamanna na talash
tu muqabil hai to hairat ke siva kya hoga
paikar-e-ishq to farhad bhi tha majnun bhi
aur vo shaḳhs ki tu ne jise chaha hoga
aaj to ḳhush huun bahut ḳhush huun bahut hi ḳhush huun
is tasavvur men main kaanp uThta huun kal kya hoga
ek vo hain jinhen ḳhalvat men bhi lutf-e-jalvat
haa.e vo shaḳhs jo mahfil men bhi tanha hoga
fikr anjam-e-mohabbat ki hai tauhin ai ‘lais’
vahi hoga miri qismat men jo likkha hoga
Leave a Reply