Mohammad Sharfuddin Sahil
dete hain jis ko ḳhun-e-jigar kam bahut hi kam
aate hain us shajar pe samar kam bahut hi kam
baaqi hain ab bhi dil pe mire zaḳhm-e-hadsat
ehsas-e-dard to hai magar kam bahut hi kam
ye munhasir hai kasb-e-halal-o-haram par
hota hai ab dua men asar kam bahut hi kam
vaa.iz ki guftugu men jo dam-e-fareb hai
paate hain us se log mafar kam bahut hi kam
ghavvas-e-bahr-e-ilm hain girdab-e-hirs men
bazar men hain la.al-o-gohar kam bahut hi kam
ehsas jin ke dil men ho karb-e-yatim ka
is ahd men hain aise bashar kam bahut hi kam
‘sahil’ jo mil gaya hai to kuchh qadr kijiye
is tarah ke hain ahl-e-hunar kam bahut hi kam
Leave a Reply