Ashraf Rafi
taraddud men hain sab ka.abon ka but-ḳhanon ka kya hoga
mujhe ye fikr hai gumrah insanon ka kya hoga
bahar aate hi pahli baat ye kahte hain divane
chaman arasta hai haa.e viranon ka kya hoga
haqiqat phir haqiqat hai samajh lo soch lo tum bhi
zaban kholenge ham jis vaqt afsanon ka kya hoga
gharibon ko jagah milti nahin hai sar chhupane ko
yahi aalam raha kuchh din to aivanon ka kya hoga
bhala ye abru-e-jam-o-mina rah bhi sakti hai
agar mai-ḳhvar uTh jaa.en to mai-ḳhanon ka kya hoga
hamare dam se tufanon ka zor-o-shor qaa.em hai
hamare Dubne ke ba.ad tufanon ka kya hoga
asiron ki riha.i se koi ḳhatra nahin lekin
nigahbanon ko ye Dar hai ki zindanon ka kya hoga
ye tabdili nizam-e-maikada par zulm hai saaqi
tu ankhon se pila dega to paimanon ka kya hoga
bujha kar sham.a ḳhud hi dekh lo ‘ashraf’ se mat puchho
bujhegi sham-e-mahfil jab to parvanon ka kya hoga
Leave a Reply