Poet
zabt-e-gham mushkil hai aur mushkil hai mushkil ka javab
naseh-e-mushfiq tire bas ka nahin dil ka javab
aa.ine men dekhte hain husn-e-kamil ka javab
koi puchhe kya vo denge jazba-e-dil ka javab
alvida.a kah kar jo dete hain mire dil ka javab
aa paḌi mushkil ki kya ho aisi mushkil ka javab
ḳhak-e-parvana ho shayad zabt-e-kamil ka javab
sham.a ho sakti hai kab mere bujhe dil ka javab
ai mire jazb-e-mohabbat teri ye be-tabiyan
aur ḳhamoshi hi ḳhamoshi jan-e-mahfil ka javab
ik saval-e-shauq par us ne hamen ghayal kiya
hashr ke din dekhna hai kya ho qatil ka javab
naghmagi inkar ki bhi hai surur-afza magar
ab kahan hai lan-tarani husn-e-kamil ka javab
un se ankhen chaar kar ke ‘taj’ main khoya gaya
ik bhari mahfil men be-ḳhud kar gaya dil ka javab
Leave a Reply