Kitne Aazar Muqaddar Se Lage Rahte Hain

kitne āzār muqaddar se lage rahte haiñ

tere bīmār to bistar se lage rahte haiñ

kabhī tujh bālā-nashīñ ko bhī ḳhabar pahuñchegī

kitne sar haiñ jo tire dar se lage rahte haiñ

shaam hotī hai to kaam aur bhī baḌh jaatā hai

an-ginat yādoñ ke daftar se lage rahte haiñ

terī furqat meñ kise jāda-o-manzil kā dimāġh

ġham ke maare kisī patthar se lage rahte haiñ

ham bhulā deñge zamāne kā chalan bhī lekin

shīsha-e-dil pe jo patthar se lage rahte haiñ

aaj bhī kūcha-e-jānāñ kī vahī raunaq hai

ab bhī kuchh log barābar se lage rahte haiñ

Leave a Comment