Wo Aarzu Ki Dilon Ko Udas chhoD Gai

Samad Ansari

vo aarzu ki dilon ko udaas chhoḌ ga.i

miri zaban pe suḳhan ki miThas chhoḌ ga.i

likhi ga.i hai miri sub.h ke muqaddar men

vo raushni jo kiran ka libas chhoḌ ga.i

uThi thi mauj jo mahtab ke kinare se

zamin ke gird falak ki asaas chhoḌ ga.i

ye kis maqam-e-tamanna se be-ḳhudi guzri

ye kis ka naam pas-e-iltimas chhoḌ ga.i

charagh-e-zist se utri thi ek harf ki lau

jilau men apni mira iqtibas chhoḌ ga.i

guzar ga.i hai ufuq se sipah-e-shab lekin

javar-e-sub.h men ḳhauf-o-hiras chhoḌ ga.i

ghaTa uThi thi kisi tishnagi ke sahra se

jo qatra qatra samundar ki pyaas chhoḌ ga.i

miri ḳhamosh-labi mujh men raat bhar gunji

sada.en kitni mire as-pas chhoḌ ga.i

ye kis ḳhayal ki parchha.in thi munDeron par

tamam shahr ko mahv-e-qayas chhoḌ ga.i

basi jo aa ke zamin men ‘samad’ shanaḳht miri

mire badan men saja kar havas chhoḌ ga.i