Sajjad Baluch
rahin-e-ḳhvab huun aur ḳhvab ke makan men huun
jahan mujh se siva hai main jis jahan men huun
ajab tarah ka ḳhirad-ḳhez hai junun mera
mujhe ḳhabar hai main kis kar-e-ra.egan men huun
tu mujh ko phenk chuka kab ka apne dushman par
main ab kaman men nahin huun tire guman men huun
miri thakan bhi tiri hijraton men shamil hai
main gard gard sahi tere karvan men huun
ulajh paḌa tha main ik roz apne saa.e se
aur us ke ba.ad akela hi dastan men huun
Leave a Reply