Khursheed Rizvi
saman ghurub ka dil men raha ubharte hue
ḳhayal ḳhaak men milne ka tha sanvarte hue
zamin udaas hai aur asman pe ḳhanda-kunan
guzar rahe hain sitare udaas karte hue
bikhar gaya to mujhe koi gham nahin is ka
ki raaz mujh pe ka.i va hue bikharte hue
fasurda itni hai is baar rahguzar-e-ḳhayal
ḳhiram-e-yar jhijakta hai gul katarte hue
mujhe bhi apna dil-e-rafta yaad aata hai
kabhi kabhi kisi bazar se guzarte hue
zamana lab pe ye angusht rakh ke kahta hai
ki dard-e-dil na kaho aur kaho to Darte hue
labon se niim tabassum bhi uTh gaya ‘ḳhurshid’
udasiyon ka mudava talash karte hue
Leave a Reply